16. janúar

Guðrún Ingvarsdóttir skipuð í embætti forstjóra Framkvæmdasýslu ríkisins

  • Skjaldamerki Íslands

Fjármála- og efnahagsráðherra hefur tekið ákvörðun um að skipa Guðrúnu Ingvarsdóttur í embætti forstjóra Framkvæmdasýslu ríkisins. 

 

Guðrún er með M.Sc. próf í stjórnun og stefnumótun frá viðskiptafræðideild Háskóla Íslands en lokaverkefni hennar þar fjallaði um umbætur í samkeppnishæfni íslensks byggingariðnaðar. Þá er hún með M.Sc. gráðu í arkitektúr og löggildingu sem arkitekt. 

Guðrún hefur víðtæka reynslu af bygginga- og húsnæðismálum en hún hefur undanfarið starfað í velferðarráðuneytinu við innleiðingu á aðgerðaráætlun stjórnvalda í húsnæðismálum. Áður starfaði Guðrún um árabil hjá Búseta sem forstöðumaður þróunar og nýframkvæmda og sem arkitekt og hönnunarstjóri hjá Arkþing og Arkís. Hún hefur jafnframt komið að ýmissi hagsmuna- og greiningarvinnu innan málaflokksins hérlendis og á norrænum vettvangi.

Alls bárust 28 umsóknir um stöðu forstjóra en þrír drógu umsóknir sínar til baka.

Hlutverk Framkvæmdasýslu ríkisins er að vera leiðandi afl á sviði opinberra framkvæmda með það að markmiði að bæta verklag og auka skilvirkni, hagkvæmni og gæði við framkvæmdir ríkisins. Stofnunin starfar samkvæmt lögum nr.84/2001 um skipan opinberra framkvæmda og þar starfa 18 starfsmenn.

Guðrún tekur formlega til starfa 12. febrúar næstkomandi. 

Mynd-gudrun