Samstarf og þróun

Mikilvægi góðs undirbúnings

Enginn vafi er á því að mikla fjármuni má spara með bættum undirbúningi  framkvæmda og leiddar hafa verið að því líkur að spara mætti 3-4 milljarða króna í íslenskum byggingariðnaði árlega ef unnt væri að sneiða alfarið hjá mistökum í undirbúnings- og hönnunarferlinu. Ljóst er að slíkt markmið er óraunhæft því mannleg mistök verða ætíð til staðar. Það ætti hins vegar að geta talist raunhæft markmið að skera þennan mistakakostnað niður um helming og telst sparnaðurinn eftir sem áður í milljörðum króna árlega. Það er því til mikils að vinna í þessum efnum. Hjá nágrannaþjóðum okkar hefur mikil vinna verið lögð í endurskoðun vinnulags við undirbúning framkvæmda undanfarin ár og eru í þessum efnum Bretar og Danir taldir sérstaklega framarlega. Bretar gáfu m.a. á árinu 2000 út stefnumótunarritið “Better Public Buildings” sem var samstarfsverkefni margra ráðuneyta og fagfélaga og Í kjölfarið hafa þeir lagt mikið fé í rannsóknir á aðferðum sem gætu leitt til bættrar hönnunar og gefið út fjölda rita um þetta málefni.

Átak stjórnvalda

Þróun á aðferðafræði við opinberar framkvæmdir á Íslandi hefur verið ör á síðustu árum og samstarf milli opinberra verkkaupa hefur aukist jafnt og þétt. Á árinu 2001 voru lög um opinber innkaup og lög um skipan opinberra framkvæmda endurskoðuð og sama ár var gefin út reglugerð um skipulag opinberra framkvæmda. Þá gaf fjármálaráðuneytið út á árinu 2002, í samvinnu við Framkvæmdasýsluna, ítarlegar “Verklagsreglur um tilhögun frumathugunar, áætlunargerðar og verklegrar framkvæmdar” í opinberum verkefnum. Á árinu 2002 kom einnig út á vegum fjármálaráðuneytisins ritið “Leiðbeiningarit um kaup á ráðgjöf”, sem unnið var í samvinnu við Framkvæmdasýslu ríkisins, Vegagerðina, Landsvirkjun, Félag sjálfstætt starfandi arkitekta og Félag ráðgjafarverkfræðinga. Allt var þetta hluti af átaki stjórnvalda í að ná fram aukinni festu í verklagi og þar með gæðum í undirbúningi, hönnun og byggingu mannvirkja. Tengla í framangreind lög og reglugerðir er að finna undir flipanum “ Um FSR - Lög og reglugerðir”.

Samstarfsaðilar

Framkvæmdasýslan tekur þátt í ýmis konar samstarfi, bæði formlegu og óformlegu, við stofnanir og hagsmunasamtök, innlend og erlend, eins og nánar er fjallað um á þessum vef.

• Innlent samstarf 

  Höfð er samvinna og samráð við aðrar ríkisstofnanir, sveitarfélög og ýmis hagsmunasamtök er starfa á þessum vettvangi. Má þar nefna samstarf um innleiðingu gæðastjórnunar við opinberar framkvæmdir, öryggismál á byggingarstöðum og samræmingu á alls kyns gögnum er tengjast mannvirkjagerð. Þá er stofnunin aðili að samtökum eins og Staðlaráði Íslands, Stjórnvísi , Steinsteypufélagi Íslands og Verkefnastjónunarfélagi Íslands. Árið 2006 voru samtökin “SOV – Samtök opinberra verkkaupa” stofnuð og var Framkvæmdasýslan einn af stofnaðilum.  Einnig er FSR þátttakandi og stofnaðili að Þróunarvettvangi á sviði mannvirkjagerðar sem stofnað var í ágúst 2007.
  

• Erlent samstarf

Framkvæmdasýslan er í samstarfi við systurstofnanir sínar á Norðurlöndum og settur hefur verið upp þrenns konar samstarfsvettvangur í því sambandi:   NKS – “Nordisk kontakt om statsbygninger”, NKU – “Nordisk kontakt om utrikesbyggeri” og NBD – “Nordisk byggedag”, en í því síðastnefnda koma mun fleiri aðilar við sögu.  Þá er stofnunin aðili að TWN – “The Workplace Network” sem eru alþjóðleg samtök opinberra verkkaupa/fasteignafélaga.  Á vettvangi NKS og TWN hefur á undanförnum árum átt sér stað mikil umræða og samráð um nýja nálgun við mannvirkjagerð eða svonefnd upplýsingalíkön.  Á ensku eru þau nefnd “BIM – Building Information Modeling” og hefur Framkvæmdasýslan tekið frumkvæði í umræðunni um þessi mál á Íslandi.