Fréttir

Endurbætur að hefjast við VR-1, tilraunahús Háskóla Íslands

Framkvæmdir við endurbætur á VR-1, tilraunahúsi Verkfræði- og náttúruvísindasviðs Háskóla Íslands, eru að hefjast. Útboð framkvæmda var auglýst í janúar og 26. febrúar 2010 var tekið tilboði Eyktar ehf.

Byggingin er á svæði Háskóla Íslands vestan Suðurgötu, nærri Hjarðarhaga. Húsið er á tveimur hæðum og er 1.840 fermetrar að stærð. Umsjón með fasteigninni hefur Bygginga- og tæknideild Háskóla Íslands. Innréttingar, sem eru frá árinu 1972, eru alveg úr sér gengnar og var nauðsynlegt að ráðast í gagngerar endurbætur innanhúss. Verða gömlu innréttingarnar hreinsaðar út og settar upp nýjar innréttingar sem eru að hluta rannsóknarstofuinnréttingar. Gagngerar endurbætur verða á frágangi innanhúss, lögnum og raflögnum og svo framvegis. Lyfturstokkur verður dýpkaður og sett upp ný lyfta. Skipt verður einnig um gler í gluggum. Framkvæmdum skal ljúka fyrir 15. september 2010.

Verkkaupi er Háskóli Íslands. FSR hefur umsjón með framkvæmdunum. Arkitekt er Arkþing ehf., hönnun lagna og raflagna vann Mannvit ehf.

Á verkefniskynningu FSR er gerð nánari grein fyrir verkefninu.